Kurdbun (کوردبوون) - Episode 16

Kitebi Kurdbun beśéke le bireweriyekani Kapitan Hemedi Mewludi ke 15 sal doay nusinewey bilaw dekretewe.

کتێبی ، بەشێکە لە بیرەوەرییەکانی نەمر کاپیتان حەمەدی مەولوودی‌‌.

سوێندیان دام بەو ئاڵا و شیر و قوڕئانە. من سوێندەکەم لە دڵەوە خوارد و بە ڕاستیشم بوو. سوێندم خوارد تا ڕوحم لەبەر دایە، بۆ کورد و کوردوستان بە گیان و ماڵ حەول بدەم. ئەوە دوو چەلە من شەریک بووم دە کۆبوونەوەی کورداندا. هەر دوو کەڕەت سوێندم بۆ کوردوستان خوارد. هەردوو کەڕەتیش تووشی قۆرتی یەکجار گەورە بووم بەڵام دیسان لوتم لێ هەڵنەئەنگاوت و پەژیوان نەبوومەوە بگرە، جار دەگەڵ جار خۆم توندوتۆڵتر دەکرد. سەرباقی ئەوانەش خۆم لەپێش چاو نەکەوتووە و خۆم لۆمە ناکەم و شانازیی بە خۆم دەکەم و خۆم ڕووسوور دەبینم لە ئاست کوردوستان و ئەو سوێندەی خواردوومە. پێمخۆشە منداڵەکانیشم وەک من سەریان بەرز بێت. هیوادارم ئەوانیش بۆ کورد سوێند بخۆن و بۆ کوردوستان گیانفیدا بن چونکە دەزانم ئەوانیش وەک من پەژیوان نابنەوە، هەرچی بۆ کوردوستان بیکەن، ئێستا کەمە. ئاخر هیچ لەوە ناخۆشتر نییە ئەمنییەیەک و عەجەمێک بێتە سەر ماڵت و سووکایەتیت پێبکات یا دەنا، بەناحەق تێتهەڵبدات. کورد دەبێ ئەوە قەبوڵ نەکات. مردن خۆشترە لەو حاڵە.