ZINDAGI SANGeDARReYAR SE AGAY NA BADH'HI by WasifAliWasif

زندگی سنگِ درِ یار سے آگے نہ بڑھی عاشقی مطلعِ دیدار سے آگے نہ بڑھی تیرگی کیسوئے خمدار سے آگے نہ بڑھی روشنی تابشِ رُخسار سے آگے نہ بڑھی دلبری رونقِ بازار سے آگے نہ بڑھی سادگی حسرتِ اظہار سے آگے نہ بڑھی خود فراموش ترے عرش کو چُھو کر آئے خواجگی جُبّہ و دستار سے آگے نہ بڑھی بس میں ہوتا تو تری بزم سجاتے ہم بھی بے بسی سایہِ دیوار سے آگے نہ بڑھی جلوہِ ذات سے آگے تھی فقط ذات ہی ذات بندگی رقصِ سرِ دار سے آگے نہ بڑھی بے خودی دشت و بیاباں سے ورا ہے واصفؔ آگہی وادئِ پُر خار سے آگے نہ بڑھی ​