#125. E-maila Guhdar L. û Kaos

22yê meha 11an ya 2023yan Guhdar L. e-maileka xatirxwestinê şand. 

Di e-mailê de Guhdar L. gotiye ku xîtaba min, Guhdar L. yanî bi wê hinekî giran hatiye. 

Gorey gotina Guhdar L. em ji xwe re şexsîyetan çêdikin, em dûre bi wan xwe wenda nekin û bi rol û maskeyên nû her tişt li nêv hev dikeve û kaos çêdibe. 

Guhdar L. gotiye ku hesabê ew pê e-mailan dişîne sexte ye û gotiye loma jî ew jiber vê kaosê diweste û diweste. 

Di dawîya e-mailê de Guhdar L. gotiye ku ew nenivîse jî ewê dîsa li Perxudres Podcastê guhdarî bike. 

Eynî royê, 22yê meha 11an ya 2023yan min jî cewab nivîsî.

Guhdar L., 

Tu kî yî, çi yî, çi kes î, te ji kîjan bajarî ji kîjan welatî nivîsîye ez tew nizanim, ewqas jî ne muhîm e, te nivîsî û ez jî bi cewaban li te vegerîyam. 

Gava e-mail û mektûb tên û ez cewabê bi podcastê didim, seba eşkere nebe ku ez behsa kê dikim, ez bi şîfreyê, bi navekî kod, bi kinkirina navan xîtabekê çêdikim. Kê mektûb, e-mail şandibe ew ji şîfreyan fehm dike ku ez behsa wî yan wê dikim. 

Ez kanim rasterast navan bidim, lê ez naxwazim jibo guhdarên e-mail û mektûban dişînin tirs û talûke çêbin. Jiber hurmeta jibo guhdaran ez wanî dikim. 

A te jî jiber navê di e-mailê de min kin kir û got L., Guhdar L. Ti nîyeteka min ya xerab tunebû û elbet min nexwest ez te bibim ber rewşeka zor. 

Tu bi e-mailên xwe ser seran hatî û xatirxwestina te jî ser çavan, tu guhdar î, ku Perxudres Podcast hebe çi xemdar î. 

Barek silav û hurmet.