#45. Ji Fatih Akın heta Tara Mamedova çend hîs

Derhêner Fatih Akın, ku ser paradoksên Tirkên li Almanyayê fîlm çêkirine, bi muzîkên diavêje fîlmên xwe hîsên hêsirî datîne sînemaya çavên min.

Mesela ji fîlmên wî, Kin û Bê Êş, bi Tirkî, Kısa ve Acısız, bi straneke Sezen Aksu diqede, lê fîlm bi tesîra dihêle ji cîhê ku diqede jinûve destpê dike. ax darên qewaxê ax darên qewaxê êş li pey min ket, li dû min fîskanîya wê Metin Altıok di sala 1982yan de çap kiriye ev şiîra bi navê Pêşgotin; Sezen Aksu di albumeke 1988an de gotiye. Navê kitaba ku Altıok ew şiîra bi darên qewaxê xistiyê, Trajedîyên Biçûk e. Trajedî: Metin Altıok di sala 1993yan de li Madımak Oteliyê tevî bi dehan hevalên xwe tê şewitandin, hefteyekê li ber xwe dide û dimire. Sax im, di guhên min de ew stran dimeşim bi mij û morana Diyarbekir re. Dernaxim makîneya xwe, nakişînim fotografan, sankî xeyidîme ji bajêr, li dilê min çend kêr. Pall Weşanê e-maileke ser spasîya bo sponsorîyê şandiye ji min re û ez dawetî kokteylê kirime. Nexweş im, çavên min nabire ez herim bi ken û kêf bireqisim li kokteylê. Naxwazim bi rûyekî tehl û tirş zirarê bidim atmosferê. Min ku ‘’l’’yek ‘’Weşan’’ek li Pall Weşanê zêde kiriye, çi bikim wekî din, zêdegavî ye. Şêrînekê hejmara 2yan ya LEWergerê anîye ji min re. Çavê min li Walter Benjamin dikeve. Benjamin dibêje, serê sibê dema hûn ji xew radibin behsa xewnên xwe mekin. Bi ya Benjamin, ha serê sibê bêyî ku tu tiştekî bixwî te behsa xewna xwe kiriye, ha te di xew de şor kiriye, eynî ye. Hevalekî min î gênc ji kansêrê miriye. Li Whatsappê navê wî dinivîsim, nabînim tiştekî. Min jê biriye, heyatê ew jê biriye. Wê heyat rokê min jî jê bibe.

Bijareyekê çêdikim ji rojnivîsk û xatirayên Zinarê Xamo. Bloger Zinarê Xamo dibêje ‘’Berî ez bimrim bibînim ku ev bijare çap dibe’’ Kî dimire kî dimîne, nivîs dimîne, Zinarê Xamo li dinyaya dîjîtal bi bloga xwe dimîne. Sar e dinê, diqerimim. Ê dîsa dicemide Hîvron e. Guhdar A e-mektûbek şandiye. Mektûb wisa destpê dike: Fehm nakim çima ji te hez dikim û dîsa fehm nakim çima tu tehmulî min nakî. Jê pê ve çi hatiye nivîsîn? Ku çi hatiye nivîsîn; cewaba min ya kin: Tehmûla min li min jî tune Guhdar A. Ez bi xwe re herbê dikim tim. Fehm nakim çima, dîsa fehm nakim çima bi xwe re herbê dikim. Tara Mamedova bi stran û klîbeke nû tê: Sîno. Ser fikra esasî ya klibê Tara dibêje ‘’Dinya weke ku ketiye nava bîreke bêserûber; şer, kuştina jinan, feqîrî, koçberî, krîzên ekonomîk û ekolojîk.. Em hesreta hêvîyeka biçûk in.’’ Dinya, dinya ya ku ji bejn û bala Tarayê re jî hêvîyeka biçûk nehiştiye, wê çi bihêle ji derd û depresîfan re. Pûç, pûç, miçiqî û meliqî, wî berde xêra wî ji te re tune, wê berde xêra wê ji te re tune. Ciwanek ji min dixwaze ku ez şiîreke Metin Eloğlu tercûme bikim, ji Tirkî ber bi Kurmancî ve. Di şiîrên Metin Eloğlu de Kurd hene. Di fîlmên Fatih Akın de Kurd. Ez ku Kurd, nizanim ez li kû heme. Jêder:    Altıok, Metin: Bir Acıya Kiracı, Kırmızı Kedi Yayınevi, 2021   Lewerger: Kovara Wergera Helbestê ya Çarmehane, Hejmar -2, 2023    Belge, Murat: Şairaneden Şiirsele, Türkiye'de Modern Şiir, İletişim Yayınları, 2018   Eloğlu, Metin: Bu Yalnızlık Benim - Toplu Şiirler (1951-1984, Yapı Kredi Yayınları, 2022 Youtube: https://www.youtube.com/watch?v=RrWjSAVpQFo&t=63s

Fotoya li qapaxê: Metin Altıok.