OPEN HEAVENS
MATALA LE LAGI MO LE ASO LULU 7 IUNI 2023
Manatu Autu: Faasusulu lou malamalama 2 (Light up 2)
Tauloto – Tusi Paia: Iopu 36:11 “‘Āfai latou te fa‘alogo ma ‘au‘auna ‘iā te ia,‘ona fa‘auma ai lea o latou aso o manuia,
ma o latou tausaga o fiafia.”
Faitauga - Tusi Paia: Isaia 40:28-31
Upu Folafola
A faasusulu atu le malamalama I le tioata, o se tasi o lanu e te vaaia o le samasama. O le samasama o le lanu lea o le la ma o se tasi o suafa o Iesu o le La o le amiotonu (Malaki 4:2). O le samasama o lo’o iai I le malamalama o le Atua I totonu ia te oe e aumai ai le faamalologa.
O le samasama o le lanu o le la, e faauigaina o le lanu o le malosiaga e leai se I’uga. Afai e te tauaveina lenei malamalama o le Atua I totonu ia te oe, e te maua ma fiafia I se malosiaga e le mafai e tagata ona malamalama ai. O le mafuaaga lea o loo faapea mai ai le Isaia 40:31 o I latou e faatalitali I le Alii e faafouina lo latou malosi. Ina ua atoa le 70 o o’u Tausaga na ou fesili I le Atua pe mafai ona ou malolo ritaea ae faapea mai e leai. Ona ou manatu lea o le a fai sina malologa mo le tausaga atoa. Ua ou iloa ane o le Tausaga lea na atoa ai lo’u 70 tausaga, e pito sili ona tele ai galuega na faia pe a fua I le Tausaga I luma atu, ae I le alofa tunoa o le Atua, o loo ou tulai pea e oo mai I le taimi nei. Tusa lava po’o le a lou matua, e le taitai ona faaitiitia lou malosi I le suafa o Iesu.
O le samasama o le lanu o le auro maoi ma o le tulaga lena afai e te pipii I le malamalama o le Atua, e tatau lava ona e manuia faulai. E le gata I lea fai mai le Filipi 4:19 ‘A o lo‘u Atua e fa‘a‘atoa e ia ‘iā te ‘outou mea uma e matitiva ai ‘outou, e tusa ma le faula‘i o lona vi‘iga, ‘iā Keriso Iesu’. O loo faapea mai foi le Salamo 23:5 o lo tatou Atua o le Atua e faulai. Talitonu mai ma le faamaoni, e pau le mea e te manaomia o se galuega matautia se tasi, ona e sopoia lea mai le pa o le mativa e faavavau (Malaki 3:10).
Sa iai se alii talavou Arapi na faaolaina I totonu o se atunuu Mosalemi, ua sola atu i Egelani ona o sauaga o le au kerisiano I lona atunuu. Ua oo atu I Lonetona ma ua galue I se faleaiga. Na matua faigata lona olaga ae na tumau pea I le faatuatua I le Atua. E iai se aso na ia faalogo atu ai I totonu o le faleaiga o tomumu se tamaloa I le faa Arapi. Na fesili I le tamaloa poo le a le mea ua tupu. O le tamaloa lenei Arapi o se milionea ae ua matua faanoanoa ua le ausia ana pisinisi o le faatauina o fale I Lonetona ona o le leaga o lana gagana faaperetania. Na matua fiafia lenei tamaloa ua na maua se tagata I lea aso e mafai ona tautala I le gagana Peretania ma le faa Arapi. Ua na ofo atu le miliona pauni mo le aso I lenei alii talavou e avea ma ana faaliliu upu mo le tolu aso.
Afai e te tauaveina le malamalama o le Atua I totonu ia te oe, e avea oe ma tagata e maua faamanuiaga e mai le Atua, I le suafa o Iesu Keriso, Amene.