OPEN HEAVENS
MATALA LE LAGI MO LE ASO LUA 23 AOKUSO 2022
Manatu Autu: Ia e Loto Mālie 2 (Be Content 2)
Tauloto – Tusi Paia: Filipi 4:11 ‘‘‘Ou te lē fai atu ‘ona o le mativa, auā ‘ua a‘oa‘oina a‘u ‘ia to‘a filemū lo‘u loto i mea ‘ua ‘iā te a‘u..”
Faitauga - Tusi Paia: Filipi 4:11-13
Upu Folafola
O le mea e sili ona maitauina i le loto ua faamalieina, o se tulaga lea e mafai ona a’oa’oina ai tatou. Na faapea mai Paulo ua a’oa’oina ia e maua le loto malie poo le loto toafilemu e tusa pe mativa, pe tele ni mea na te umia. E manaomia e tagata uma ona latou mauaina le loto malie. Aua a e maitau lelei le upu a Paulo, ona e malamalama foi lea i lona mafaufau. O le mea tonu na ia saunoa ai, sa fa’amalieina lona loto, tusa pe lē tagolima pe maumea, a o lea na ia silafia lelei e lē tumau lona iai i lea tulaga. E faatāuaina le ituaiga mafaufauga lenei, ina ia a’oa’oina ai i tatou ia tatou maua le loto malie. Afai e te silafia e lē tumau le tulaga o e iai, ma e iloa foi e vave ona toe suia lea tulaga mo le lelei, ona e maua ai lea o le loto malie i mea ua e umia i le taimi nei.
Afai foi e te iloa e le o aso uma e faia ai ni ‘aiga tetele, ona leai foi lea o sou naunautaiga e te taumafaina ni mea ‘ai eseese i aso uma. A o le mea moni, o mea ‘ai e te manaomia e tatau ma le aso ma maua ai lou malosi, e fa’agata ai foi iinā sou mana’oga. O le taimi lava e te maua ai le loto malie, e amata ai fo’i ona e fiafia i le filemu o le Atua e silisili I mea uma e manatu iai, auā o le a e lē toe popole mo a taeao. O le taimi lava e te maua ai le loto malie, e le toe iai se tasi e mafai ona fa’aosoosoina oe e te gaoi pe taufa’asese ni faamaumauga, ma o le a fa’afuasei ona e silafia, e leai se mea e tasi e mafai e so’o se tagata ona toe fa’amaluelueina ai ‘oe. A o le taimi e te le mauaina ai le lotomalie, e ono ta’ita’iina ai oe e faia se mea e lē tatau ona e faia, ma faafuasei ai ona e fefe ia Iesu Keriso, aua ua ia fetalai mai I le Ioane 14:30‘Ou te lē toe tautala atu ‘iā te ‘outou i ni ‘upu e tele; auā o le a sau le ali‘i o lenei lalolagi, ‘ae lē maua e ia se mea ‘iā te a‘u.
Afai e te loto malie I mea ua foai e le Atua ia te oe, ona e le mulimuli lea ma talia mea o loo ofo atu e le tiapolo ia te oe. I le tusi o le Luka 4:2-8 na ofoina atu e Satani ia Iesu le ‘oa ma le tamaoaiga o le lalolagi faatasi ma le pule, ae ui lava ina ua gālala Iesu i le fia ‘ai, ma ua lē lava fo’i o ia, e ui ina faaosoosina Iesu, na te le’i taliaina le ofo a Satani auā ua faamalieina lona loto i mea ua foaiina e le Atua ia te ia. Afai e te talitonuina folafolaga a le Atua mo lou lumanai manuia, o le a leai sou masalosalo poo le manaonao I mea a isi e ono le maua ai le avanoa I nei faamanuiaga. O le lē maua o le lotomalie, ua uunaia ai isi tagata e gaoia le afe ma afe o tupe, ma leiloa ma latou le maua le piliona o tupe sa fuafuaina e le Atua e avatu mo i latou.
Tatalo
Le Alii e, ia aoaoina a’u ou te maua le lotomalie, I le suafa o Iesu, Amene.