OPEN HEAVENS
MATALA LE LAGI MO LE ASO LUA 24 ME 2022
Manatu Autu: O Faamaufaailoga e Fitu 6 (The Seven Seals 6)
Tauloto – Tusi Paia: Mataio 24:29 ‘29“A mavae atu le puapuagā o ia ona aso, ‘ona fa‘apogisāina loa lea o le lā, e lē susulu mai fo‘i le masina, e pa‘u‘ū fo‘i fetū mai le lagi, e lūlūina fo‘i ‘au a le lagi.
Faitauga - Tusi Paia: Faaaliga 6:12-17
Upu Folafola
A o’o ina tatalaina le faamaufaailoga lona ono, o le a lūlūina fo‘i ‘au a le lagi ma le fogaeleele. Fai mai le Tusi Paia o le a iai se mafui’e tele, o le a ‘faapogisāina le lā ma ua uliuli e pei o le ‘ie fulufulu talatala. I lena aso, fai mai le Tusi Paia o le masina fo‘i ‘ua liua e pei o le toto a’o fetū fo‘i o le lagi ‘ua pa‘u‘ū i le lalolagi, e pei o le mati ‘ona to‘ulu o ona fua moto pe a lūlūina e le matagi tetele. Fai mai o le a mavae atu fo‘i le lagi pei o se tusi ‘ua ta‘aia, o mauga ma motu uma fo‘i ‘ua ‘ave‘eseina i mea sa i ai ona o mafui’e. E tele perofeta o le Feagaiga Tuai, e o’o ia Iesu Keriso, na latou valoia ma faia perofetaga e faatatau I lea aso (Ioelu 2:31, Isaia 34:4, Sefanaia 1:14, Mataio 24:29).
O mea na vaaia e Ioane o ni fetu e pauū ifo I le fogaeleele e mafai ona faavasegaina i ni tulaga se lua. Muamua, o tagata su’esu’e popoto o le Tusi Paia, o loo faapea mai, o nei fetu e pauū mai I le lagi, e faauigaina o ni meatau faatonutonu alu mamao ma ua maea saunia e malo tetele I nei aso. O le taua lea, o le a tauaina e meatau faatonutonu alu mamao. A pauū mai I le eleele nei meatau, e foliga mai o ni fetu ua pauū mai I le lagi. Lona lua, e mafai foi ona faapea na vaaia ma iloa e Ioane ni fetu moni o loo pauū mai I le lagi. A e faia sina suesuega laitiiti, e te iloa ai, e iai ni ma’a tetele na pauū mai I le vateatea I le fogaeleele. A pauū mai nei ma’a tetele mai le vateatea, e mu ma salalau ae le’i o’o mai I le lalolagi I taimi ua tuanai. Ae na iai lava ni ma’a tetele na pauū ma aafia ai nisi o vaega o le lalolagi. E le o iloa poo ni fetu moni, po’o ni ma’a tetele e pauū mai I le vateatea po’o ni meatau faatonutonu alu mamao e pauū mai le lagi, pau le mea e mautinoa, o le a matua tele ituaiga mea e pauū ma mu I le lagi ma o so’o se tagata e tilotilo atu I le lagi o le a vaaia e pei o le lagi ua ta’ai ese atu. I le taimi lava lea e tasi, o le a luluina ni mafuie tetele ma o mauga ma motu, o le a aveesea mai o latou tulaga. Talosia e aua lava nei e iai I le lalolagi I le taimi e tupu ai nei puapuaga ma faaletonu, I le suafa o Iesu.
I le fuaiupu e 15-17, fai mai o tupu fo‘i o le lalolagi, ma ali‘i sili, o le a o atu ma lalafi i ana ma papa o mauga. O le a le iai se eseesega o le tupu ma le pologa I lea aso. Fai mai le Tusi Paia, o tupu o le lalolagi, alii sili ma ta‘ita‘i o ‘au, ma ē ‘ua tamao‘āiga, ma ē ‘ua malolosi, ma pologa uma, ‘atoa ma tama a le ‘ele‘ele uma ‘ua latou lalafi i ana ma papa o mauga. O le tulaga lea e ta’u sa’o atu ai ia te oe, o tulaga tauoloa o lo’o e naunau e saili I le taimi nei, o le a matua leai sona aoga I le iuga. I aso mulimuli, o le a le taulia ni tulaga mau tofi. O le mativa ma le mauoa e mu faatasi I seoli pe afai latou te le salamo. O le pule o le maota ma lana auauna teine, e la te sosoo faatasi ma mu I seoli pe afai o laua uma o le a le iai se salamo. O le Pule sili I le ofisa ma le leoleo faitotoa e la te puapuaga faatasi I le toasa o le Atua pe afai e la te le maua uma le lagi.
E tau lava o se upu mo le tagata poto. ‘Aua e te manatu tele I mea o le lalolagi ae taulai lau vaai ina ia e maua le lagi, I le suafa o Iesu, Amene.