OPEN HEAVENS
MATALA LE LAGI MO LE ASO TOFI 4 ME 2023
Manatu Autu: O le taumafataga e maua ai le ola (The meal that gives life)
Tauloto – Tusi Paia: Ioane 6:33 ‘auā o le areto mai le Atua, o le mea ‘ua alu ifo mai le lagi lea, ma ‘aumai le ola i le lalolagi’.
Faitauga - Tusi Paia: Ioane 6:48-58
Upu Folafola
O le māfuaaga o le taumafa, ina ia mafai ona tatou maua le malosi, le soifua mālōlōina lelei ma le ola. A o ‘ou laitiiti, e i ai se matou muagagana faapea: matou te aai ina ia maua le ola, matou te lē ola e aai. Ae peitai, o meaai masani tatou te aai ai, e iai tulaga e le atoatoa ai. O se tasi o ia tulaga e le maua atoatoa ai vitamini e te manaomia mai se taumafataga se tasi. Ae peitai, e iai se taumafataga se tasi e maua ai le ola e faavavau. O le tino ma le toto o Iesu Keriso. A e le taliaina lenei talisuaga paia, e leai sou ola i totonu ia te oe. (Ioane 6:53).
I le tusi a Iosua 14:6-14, o Kalepo o se tasi o tagata na ai i falaoa o le Paseka, na faapea mai I le 85 o ona tausaga, ‘o lo’o maua pea lo’u malosi e pei ona sa ou i ai i le 45 tausaga o ou Tausaga. Afai e te talia le Talisuaga Paia o le faamanatuga, e toe faafouina lou malosi; o vaivai o lou tino sa i ai, ua mou ese atu. I ni nai tausaga ua mavae atu, sa ou auai atu i se polokalame i se isi atunuu, ma i se tasi o a'u savaliga i lena taeao, na ou lagonaina le vaivai, ma ua tau le mafai ona ou savali, ma na ou toe foi loa i lo'u fale. Mulimuli ane, na ou manatuaina le Talisuaga Paia o le Faamanatuga e faataunuuina i lena afiafi. O le afiafi lava lena, ina ua maea ona tália le faamanatuga o le tino ma le totó o Iesu, na toe faafoisia lo'u malosi. Fai mai le tusi a Salamo 105:37, o lo’o talanoa mai le Tusi Paia e uiga i le fanauga a Isaraelu o e na aai i le taumafataga o le Paseka: e leai se tasi na vaivai i totonu o lena potopotoga. E malolosi uma lava ma mālōlōina. O gasegase uma, e te le toe faalogoina ni tiga, pe a e talia lenei Talisuaga faapitoa. I le Ioane 6:54 na fetalai ai le Alii o Iesu Keriso e uiga i le Talisuaga Paia:
‘O lē ‘ai i lo‘u tino ma inu i lo‘u toto, ‘ua ‘iā te ia le ola e fa‘avavau; ‘ou te toe fa‘atūina fo‘i o ia i le aso gata‘aga;’ Ioane 6:54
Tatou te aai ina ia maua le ola, maua foi le malosi ma ia maloloina uma i tatou, ae o le Talisuaga Paia o le faamanatuga e maua uma ai faamanuiaga nei. E faaaoga o se fofo e pei o fualaau, e le tutusa ma Fualaau masani aua e tetee atu ai le oti. Fai mai le Esoto 12:13 e ‘alo ese le oti ma oe pe a silasila i le toto. O le toto o Iesu lea e faatusa i le uaina i le talisuaga Paia. Ou te talitonu i le Atua mo outou uma, a tatou taliaina le Talisuaga Paia, e ‘alo ese le oti mai o outou aiga, i le suafa o Iesu.
O le talisuaga paia o le faamanatuga, o le taumafataga pito sili ona taua lea e ai ai se tagata, I le suafa o Iesu Keriso, AMENE