ምሉእ ትሕዝቶ ኤስ ቢ ኤስ ትግርኛ (08 ሓምለ 2024)

* ጸብጻባት ዜና ናይ ሎሚ: ኣብ ብዙሕ ከባቢታት ትግራይን ኤርትራን ጽቡቕ ክራማት ጀሚሩ፣ ኣብ ከተማ ዓዲግራት ግን ልዕሊ 9.4 ሚልዮን ብር ዝግምቱ ንብረት ከምዘዕነወ ተሓቢሩ፣ ፍሉይ ልኡኽ ኣመሪካ ኣብ ቀርኒ ኣፍሪቃ ማይክ ሃመር ናብ ኢትዮጵያ ክጓዓዝ ምዃኑ ኣፍሊጡ፣ ሓድሽ መንግስቲ ኢንግሊዝ ንምጥራዝ ስደተኛታት ደው ከም ዘብሎ ገሊጹ፣ ኣብ መዓስከር ኣለምዋጭ ጎንደር፡ ሸውዓተ ኤርትራውያን ብዕጡቓት ብሳንጃ ከም ዝተወግኡ ተሰሚዑ፣ ኣብ ኤርትራ ብውሕዱ 218 ኣመንቲ ክርስትና ከምዝተኣስሩ ገሊጹ፣ ኣብ ኢትዮጵያ 4.5 ሚሊዮን ሰባት ተመዛቢሎም ከም ዘለዉ ተሓቢሩ። * ኣብ መላእ ሃገር ቁሪ እናሓየለ ኣብ ዝኸደሉ እዋን ኣውስትራልያውያን ገዝኦም ኣብ ዘውዕይሉ ወይ ዘሙቕሉ እዋን ከጋጥሙ ዝኽእሉ ተኽእሎታት ሓደጋ ከስተውዕሉሎም ሓደስቲ መጠንቀቕታታት ይወሃቡ’ለዉ። እዚ ዝመጽእ ዘሎ ኣብ’ዚ ወቕቲ ቁሪ ሓጋይ ድሕሪ ዘጋጠሙ ምቅጻላት ኣባይትን ምምራዝ ጋዛት ካርቦንሞኖክሳይድን’ዮም። ነዚ ዝምልከት ሓደ ትሕዝቶ ኣለና። * ጋዜጠኛ ካልድ ዓብዱ ኣብ ኤርትራን ኣብ ኢትዮጵያን ዘሎ ፖለቲካዊ ምዕባለታት ዝትንትን ነባሪ ሃገረ ሽወደን እዩ። ኣብ ኣውስትራሊያ ኣብ ዝበጽሓሉ ብዛዕባ ታሪኹን ዘካይዶም ንጥፈታትን ሰፊሕ ዕላል ኣካይድናሉ ኣለና። ኣብዚ ናይ ሎሚ ክፋል ዕላል ብዛዕባ ኣብ ማሕበራዊ መራኸቢታት ዘቕርቦ መደባትን ብመንእሰያት ዝኸይድ ዘሎ ተቓዉሞታት ዝምልከቱን ብዛዕባ ስርሑን ኣዕሊሉ ኣሎ። * ኣብ መወዳእታ ሰሙናዊ መደብ ስፖርት ንቅያታት ቢንያም ግርማይ ኣብ ዙር ፈረንሳ፣ ምዝርጋሕ ኣስማት ጋንታ ኦሎምፒክስ ኢትዮጵያን ግጥማት ኩዕሶ እግሪ ዩሮ 2024 ክትንትን’ዩ።