ቀጥታ ምሉእ ትሕዝቶ ኤስ ቢ ኤስ ትግርኛ (20 ግንቦት 2024)

ሶኑይ 20 ግንቦት 2024 መደባትና * ደገፍቲ ፍልስጤም ኣድመኛታት ንዋዕላ ሰልፊ ለይበር ግዝኣት ቪክቶርያ ኣብ ከተማ መልበርን ብሓይሊ ኣትዮሞ። እዚ ቀቅድሚ መደረ ቀዳማይ ሚኒስተር ንደገፍትን ክትዓት ብዛዕባ ንግጭት ቓዛ ዝምልከቱ እማመታትን ዝተፈጥረ ክስተት ነቲ ዋዕላ ዘሪግዎ። ነዚ ዝምልከት ሓደ ትሕዝቶ ኣለና። * ሓጺር ናይ ሓሙሽተ ደቒቕ ኣስተምህሮ ኣደማምጻ ቃላት ኢንግሊሽ ክቐርብዩ። ንህብብቲ ጋዜጠኛ ቴሌቪዥን ኤስቢኤስ ኒውስ ጃኒስ ፒተርሰን ብምስማዕን ብምኽታልን ኣደማምጻና ከነመሓይሸሉ ንኽእል መደብ’ዩ። * ከባቢ 300 ኣውስትራላያውያን ኣብ'ታ ሕጂ ብዕግርግር ትሕመስ ዘላ ኣብ ሰላማዊ ውቅያኖስ ትርከብ ደሴታዊት ምምሕዳር ኒውካሌዶንያ መዋጽኦ ስኢኖም ይርከቡ፡ ለውጢ እማመ ኣብ ምሃብ ድምጺ ኣብ'ታ ደሴት ዘንቀሎም ናዕቢታት ይቕጽሉ ስለዘለዉ። እቶም ኣውስትራልያውያን ሕጽረት መግብን ማይን ከምዘጋጠሞም ክግለጽ’ንከሎ መንግስቲ ኣውስትራልያ ኸኣ ካብኡ ከውጽኦም ጻዕርታት ጀሚሩ’ሎ። ነዚ ዝምልከት ሓደ ኣጀንዳ ናይ’ዚ ሰሙን ኣለና። * ኣብ መወዳእታ ኸኣ ሰሙናዊ መደብ ስፖርት ኣለና - ኣብ ሎሳንጀለስ ኣሜሪካ ኢትዮጵያዊ ሰለሞን ባሬጋ ንሓያላት መቐናቕንቱ ቀዲሙ ተዓዊቱ፣ - ቢንያም ግርማይ ኣብ ቅድድም ብሽግለታ ዙር ኢጣልያ ድሕሪ ምውዳቑ ንፈለማ ግዜ ናብ ውድድር ተመሊሱ፣ ኣብ ጂሮ ድ’ኢታልያ ኸኣ ኣማኑኤል ገ/ሄርን ሄኖክ ምሉእብርሃንን ተሳትፎኦም ይቕጽሉ፣ - ሳልሳይ ዙርያ መጻረዪ ግጥማት ንዋንጫ ዓለም ኩዕሶ እግሪ ደቀንስትዮ ት17 መንእሰያት ኣብ ናይሮቢ ተኻይዶም ኬንያ ንኢትዮጵያ 3-0 ስዒረንአን፣ - ፕሪምየር ሊግ ዓዲ እንግሊዝ ብዓወት ማንቸስተር ሲቲ ተዛዚሙ፣ ኣርሰናል ካልኣይቲ ክትወጽእ’ንከላ ኣሌክሳንደር ኢሳቕ ከኣ ብብዝሒ ሽቶታት ኣብ’ዚ ወቕቲ 21 ኣመዝጊቡ ሳልሳይ ወዲኡ፣